Fermer kartlarının nağdsız hesablarında əkin subsidiya məbləğlərinin maliyyələşdirilməsindən 2020-ci ilin sonuna 7,1 mln. manat (illik icra olunmuş əkin subsidiyalarının 3,1%-i qədər), 2021-ci ilin sonuna 23,1 mln. manat (illik icra olunmuş əkin subsidiyalarının 9,0%-i qədər), 2022-ci ilin sonuna 26,7 mln. manat (illik icra olunmuş əkin subsidiyalarının 10,8%-i qədər) subsidiya məbləğləri qalıqda istifadəsiz qalıb.

“APA-Economics” xəbər verir ki, bu barədə Hesablama Palatasının "Dövlət auditi jurnalı"nda məlumat əks olunub.

Məhsul subsidiyasının verilməsi üzrə 2022-ci ildə 59584,9 min manat vəsaitin xərcləndiyi göstərilib ki, bu da 2021-ci ilə nisbətən 30574,1 min manat və ya 2,1 dəfə çox olub. Belə ki, pambığın tədarükçülərə təhvil verilməsinə görə ödənilmiş məhsul subsidiyasının məbləği 2022-ci ildə 56438,3 min manat olmaqla 2021-ci illə müqayisədə 28078,5 min manat və ya 2,0 dəfə çox olduğu halda, respublikada 2022-ci ildə cəmi 322,5 min ton miqdarında pambıq tədarük edilərək əvvəlki illə (287,0 min ton) müqayisədə 12,4% çox olub.

2022-ci ildə əvvəlki 2 ildən fərqli olaraq pambıq əkininə görə əkin subsidiyası verilməyib, eyni zamanda pambığın tədarükçülərə təhvil verilməsinə görə 1 ton üzrə 170,0 manat məbləğində məhsul subsidiyası (2020-2021-ci illərdə həmin məbləğ 100,0 manat olub) ödənilib.